p.enteux.44_1

βασιλεῖ Πτολεμαίωι χαίρειν Διοσκουρίδης, Νικάνωρ. ἀδικούμεθα ὑπὸ Νεφορσούχου. δανεισαμένη γὰρ παρʼ ἡμῶν τοῦ κϛ ἔτους, παρὰ Διοσκουρίδου μὲν χαλκοῦ δραχμὰς ι, παρὰ Νικάνορος χαλκοῦ δραχμὰς ιδ, ὥστʼ εἶναι δραχμὰς κδ, οὐκ ἀποδίδωσιν ἡμῖν παρὰ τὸ ἀπεληλυθέναι αὐτὴν εἰς Κερκεσοῦχα, τῆς Ἡρακλείδου μερίδος, καταφρονοῦσαν ἡμῶν. δεόμεθα οὖν σου, βασιλεῦ, εἴ σοι δοκεῖ, προστάξαι Διοφάνηι τῶι στρατηγῶι γράψαι Δεινίαι τῶι ἐπιστάτηι Κερκεσούχων ἀνακαλεσάμενον αὐτήν, ἐὰν μὲν ὁμολογῆι, πράξαντα αὐτὴν ἀποδοῦναι ἡμῖν, ἐὰν δέ τι ἀντιλέγηι, ἀποστεῖλαι αὐτὴν ἐπὶ Διοφάνην τὸν στρατηγόν, ὅπως ἂν τύχωμεν τῆς παρὰ σοῦ φιλανθρωπίας. ____ εὐτύχει. ____ Δεινίαι. μάλιστα διάλυσον αὐτούς · εἰ δὲ μή, ἀπόστειλον ὅπως ἐπὶ τοῦ κοινοδικίου διακριθῶσιν. ἔτους α, Γορπιαίου κη, Τῦβι ιβ.

p.enteux.44_2

ἔτους α, Γορπιαίου κη, Τῦβι ιβ. Διοσκουρίδης, Νικάνωρ πρὸς Νεφερσοῦχιν περὶ δραχμῶν κδ.